"Imaxínese a un home sentado no sofá favorito da súa casa. Debaixo ten unha bomba a piques de estalar. El ignórao, pero o público sábeo. Isto é o suspense". A frase pertence a Alfred Hitchcock. Pois ben, no concello de Ferrol hai unha bomba de reloxería. A maioría dos ferrolanos non o saben, pero os que o sabemos estamos preocupados.
O que si sabemos todos é que, por fin, a EDAR de Prioriño está depurando as augas negras de Ferrol... e de Narón. Tamén sabemos que este traballo faio Emafesa, e que non se aprobou aínda a taxa de saneamento que debemos pagar a veciñanza, pero aprobarase. Como é lóxico, Emafesa cobrará con atraso estes meses. Pagaraos o Concello dos seus propios fondos, ou pagaremos-los no recibo... Xa se verá.
Emafesa está depurando tamén as augas de Narón, sen que se pechara o acordo co concello veciño.
Ferrol e Narón suman 107.734 habitantes, e a este último correspóndelle o 36.6% desta cifra. Con todo, ambos concellos acordaron que Narón pagaría só o 30% do saneamento conxunto, o que indica que algo se negociou mal por parte de Ferrol. Por outra banda, ao non asinar aínda ningún convenio, os nosos veciños poden terminar por non pagar a factura do que se ha depurado, porque consideran que Emafesa inflou o custo.
Por que Augas de Galicia non xestiona a EDAR?
A empresa pública Augas de Galicia xestiona unhas quince depuradoras, e cobra aos usuarios o canon de vertidos que ordena a Xunta, inferior ao que cobra Emafesa. Aparentemente era a mellor opción, e era a que defendía e segue defendendo o concello de Narón. Con todo, PP, Cidadáns e Ferrol en Común decidiron encomendar a Emafesa a xestión da EDAR. En contra votaron PSOE e o BNG.
Cando este artigo se publique, Emafesa xa presentaría o quinto recibo, e aínda que descoñezo o seu importe, calculo que cada un deles achegarase aos 250.000 euros. Imaxínense que Narón se nega a pagar os 375.000 euros que lle corresponden, porque sinxelamente non hai ningún papel que lle obrigue a iso. Non impedir que che depuren as túas augas residuais, non quere dicir que aceptas abonar a factura. Quen o pagará? A resposta é Ferrol. E cada mes que pase sen resolverse o contencioso, os contribuíntes ferrolanos veremos como se nos escamotean 75.000 euros que podían e debían ser investidos na nosa cidade. Aínda que finalmente se renegocie e Narón pague (non está nada claro que teña que facelo con efectos retroactivos), pagará o que considere xusto, así que os ferrolanos perderemos diñeiro por partida dobre: o moito ou pouco que regalariamos a Narón, e o que paguemos de máis a Emafesa.
Publicado o 9 de setembro de 2017 en Galicia Ártabra Dixital.
---
